阿塞拜疆呢個國家，對於香港人嚟講可能會有啲陌生，不過呢個國家近幾年成為西方國家嘅重要能源合作伙伴，國家經濟前幾年亦因為能源工業而得以發展。如果要講一帶一路發展，呢個國家值得史友們注意。

阿塞拜疆响阿拉伯語有火之國嘅意思，呢個國家所在地最早有人居住可以追溯到青銅時代。波斯王國、阿拉伯帝國、土耳其人、蒙古人等都先後統治過呢個地區。後嚟有一段長時間被俄羅斯統治，直至1917年11月先建立一個獨立嘅阿塞拜疆民主共和國，不過又好快咁成為蘇聯加盟共和國。到咗1991年先再次獨立。

咁呢個國家有啲乜嘢呢？就係油氣資源喇！阿塞拜疆擁有過百年嘅開採石油歷史，近年更積極响裹海開發「海」上油田。响2014年石油同天然氣佔阿塞拜疆出口總額九成以上，而油氣資源亦令呢個國家嘅經濟得以發展。不過咁，近期油價爆跌亦令呢個國家經濟出現問題。

講開又講，阿史介紹呢個國家其中一個目的係想講下高加索地區嘅歷史恩仇。簡單而言，阿塞拜疆同鄰國亞美尼亞關係就唔多好，上星期仲發生咗30年來最大規模嘅軍事衝突。點解呢？今次兩國發生軍事衝突嘅地區叫納戈爾諾-卡拉巴赫地區，呢個地方响蘇俄時代歸咗俾阿塞拜疆，但裡面嘅人就以亞美尼亞人為多，結果兩國就為呢塊土地開戰，打咗六年先响1994年簽署停火協議。

所以話，如果要去呢個國家尋找機遇，了解一下呢個國家嘅過去同現況似乎會好啲。