77年前嘅12月，香港展開守護家園嘅保衛戰。今日同大家講講港島其中一場激烈戰役——灣仔黃泥涌峽攻防戰。

1941年12月中，新界同九龍半島率先淪陷，日軍後嚟登陸北角、太古同鰂魚涌，同守軍發生激戰，包括黃泥涌峽慘烈嘅攻防戰。黃泥涌峽重要性响邊？佢把握住港島南北交通咽喉。當時嚟咗香港幾個禮拜嘅加拿大溫尼伯近衛營連同其他士兵等，共二百幾人齊齊堅守陣地。守衛一方以兩座機槍同高射炮，迎戰响港島東北面登岸、向黃泥涌峽推進嘅大批日軍，雙方惡戰16小時，超過一半守軍陣亡，包括部份被日軍所殺嘅重傷士兵。

加拿大士兵奧斯本係其中一個犧牲嘅士兵，話說當時日軍圍攻機槍堡，向堡上嘅通風管道掟手榴彈，英勇嘅奧斯本將大部份手榴彈掟返出去，但係趕唔切丟其中一粒手榴彈。佢即刻大叫，等同伴有所警惕，然後用血肉之軀遮蓋手榴彈，魂斷黃泥涌峽。

黃泥涌峽被日軍佔領後，港督楊慕琦於幾日後嘅聖誕節向日軍司令投降，令香港踏入淪陷嘅黑暗歲月。去到2009年，黃泥涌峽嘅軍事遺址被列為二級歷史建築，保留咗當時用嚟指揮嘅磚屋同碉堡陣地，等大家於綠樹環繞之地，回顧昔日戰火漫天嘅歷史痕跡。

圖片嚟自網絡。