講開香港嘅老字號品牌，整膠製品整到出曬名嘅紅A肯定係其中之一。曾幾何時，可以話係幾乎家家戶戶都有佢哋嘅膠水桶，後嚟學童專用嘅太空喼亦掀起當時嘅潮流，等阿史同大家介紹依個「香港製造」品牌嘅歷史故事。

紅A其實係星光實業有限公司旗下嘅品牌，於1949年由商人梁知行成立，紅A原本同其中一隻啤牌一樣叫「ACE」，代表第一同最好嘅意思，之後刪咗C同E兩個英文字，兼且襯返商標嘅紅色底，所以命名為「紅A」。

去到五六十年代，美國同日本開始興起比較平同耐用嘅塑膠產品，紅A唔執輸，從日本引進機器，推出第一支塑膠牙刷後，開始製造唔同種類嘅日用品。

無幾耐香港制水，因水壓問題，高層同低層住戶爭住用水，令「樓下閂水喉」成為當時嘅「潮語」，紅A順應市場所需，生產水桶同水盆，仲教人點樣用約一加侖水洗澡，營造出強勁氣勢，而更犀利嘅係，紅 A連夜趕製十萬個水桶應市，成功搶佔市場，生意亦愈做愈大。

除咗水桶，紅A於1970年代緊貼九年免費教育嘅推行，創造經典嘅太空喼產品，標榜跌唔爛、踩唔扁，仲可以當櫈坐，售價並唔平，所以當時學生哥一喼在手，絕對威盡全場。到咗近年，1997年禽流感爆發，香港政府向紅A買咗大批膠造雞籠，可見紅A嘅產品依然於市場上佔有重要席位。 

原圖嚟自網絡。