之間同大家講開中華武術，無論南派定北派，都會令人諗起南獅同北獅。香港地處南方，自然流行南獅，不過大家又知唔知，點解南獅又叫醒獅？其實依個獨特嘅叫法係同南拳息息相關。

中國本土最初有老虎無獅子，然而神話中嘅瑞獸有龍、獅、麒麟、貔貅、白虎、朱雀、玄武、饕餮等。根據記載，漢代時西域朝貢獻獅，到唐代更傳入「五方獅子舞」，用嚟演繹鬼神祭祀。而佛教文殊菩薩以獅為坐騎，民間仲有驅年獸、保莊稼嘅傳說。响舞獅方面，成年北獅稱為太獅（有雄、雌嘅分別），一般由兩人操控同舞動；幼年北獅則稱為小獅，由一個人獨挑大樑。表演時，多數由武士帶領，同時大耍北派筋斗及功架，多跳躍翻騰嘅動作，充份顯示北派功夫嘅獨特架式。南獅就被稱為瑞獅，同樣由兩人前後配合舞動。佢唔單止造型獨特、氣勢雄壯威猛，仲好有王者風範，觀賞價值極高。登台表演時，南獅多數以「大頭佛」開路，造出多種諧趣招式，營造出歡樂氣氛。

其實一直以嚟，舞獅都係武館嘅專利同象徵。而南獅跟南派武術兩者可以話係形影不離。南拳氣剛勢強，注重腰馬合一；下盤穩健，上橋硬朗，而依啲特色都係醒獅身上展現出嚟。自八十年代後，香港醒獅嘅表演形式起咗翻天覆地嘅變化：從地面跳上梅花樁，又從穩紮馬步變為輕靈巧動，造出種種難度極高，驚險性極強嘅套路。因此，它亦被稱為南獅北舞或新派南獅。配合聲威勢壯嘅鼓、鑼、鈸，令觀眾當堂醒神曬！

圖為前港督彭定康當年主持醒獅點睛。原圖嚟自網絡。