踏入新一年，講吓啲喜慶題材先。之前提過香港流行嘅南獅同南派武術有密不可分嘅係，其實舞獅源起有多種講法：用嚟祭祀辟邪、驅逐年獸、慶賀時節等，近代有店鋪開張、大時大節咁，好多時有醒獅旺場。南派醒獅嘅精彩之處，又點少得一開始嘅點睛儀式同壓軸嘅採青環節？

其實點睛之前，先有開光、灑淨、氣沖、簪花掛紅等儀式。繼而响獅子嘅眼、額、口、鼻、角、耳、全身，點上赤紅硃砂。象徵賦予生命，寓意吉祥守正。至於點睛嘅時候，武館師傅都會一邊做禮儀，一邊講啲好意頭說話；例如一點龍精虎猛、再點大吉大利、三點一帆風順、國泰民安等，當然內容會因應情況而有所改變。

去到戲肉嘅採青，更加係高潮迭起。「青」分為「旗青」及「菜青」，前者會寫啲吉利語句，例如「國泰民安、風調雨順」，「一本萬利、財源廣進」；後者綁上生菜，寓意「生財」，亦都有縛上多種蔬菜嘅「樣樣齊」。唔講唔知，仲有啲好罕見嘅「五行八卦青」，諸如「蛇青」、「蟹青」、「七星伴月」、「九宮飛星」、「三英戰呂布」等等。雖然今時今日嘅社會急速現代化，但阿史希望依啲南派醒獅獨有嘅「奇門遁甲」式採青技藝唔好失傳，可以繼續保留落去。 

圖為「旗青」及「菜青」。原圖嚟自網絡。