一間酒店之所以受歡迎，除咗設備同服務，創新都係其中一種吸引客人嘅元素。近四十年前，中山溫泉賓館憑住先進技術同設備、管理理念以及管理制度，聞名中外，令唔少人湧去參觀。情況有幾墟冚？誇到要收門票，問你服未。

中山溫泉賓館1979年由港澳著名商人霍英東同何鴻燊投資興建，係中國第一間中外合作酒店。而霍英東係望到《澳門日報》刊登咗中山縣翠亨村開闢旅游區嘅報道，先萌生去中山投資嘅諗法，不過點解佢會揀起一間賓館而唔係其他？

話說霍英東當年去到中山考察，住响中山縣招待所入面，間招待所嘅衛浴設備較為落後，例如無沖涼嘅花灑頭。咁客人想沖涼點算好？職員會拎住熱水同涼水各一桶到客人房，就當係提供咗沖涼用水。霍英東後嚟發現嗰度有個溫泉泉眼，於是再三考察之後，決定興建溫泉賓館。

當時起賓館所用嘅鋼筋都係用進口貨，而酒店嘅電視、電話、浴盆、衣架、煙灰缸等，則係霍英東由美國買返嚟嘅。溫泉賓館1980年剛剛開業時，吸引唔少同行同埋遊客參觀，高峰時期一日要十幾批人去「朝聖」，由於人太多嘅關係，搞到溫泉賓館要收兩毫子一張門票，直至八十年代人流減少先至取消收費。

原圖嚟自網絡。