上次講完華僑第一位百萬富翁陳芳嘅少少威水史,今日繼續補充多少少。話說陳芳同夏威夷公主朱麗亞婚後嘅生活非常恩愛,仲生咗15個小朋友。1889年,陳芳同原配夫人生嘅長子去世,加上夏威夷當地嘅憲法變更、排華現象嚴重,陳芳心灰意冷,帶住次子陳席儒依依不捨咁同老婆仔女告別,返咗中國。

陳芳1891年同個仔去澳門,結果被澳門南灣三號一間酒店嘅保安攔住,理由係華人不得入內。陳芳聽到之後好嬲,即刻要求見酒店經理,仲叫埋澳門本地商會、媒體一齊到場,跟住當衆宣佈要用5000蚊美金買咗呢間酒店,仲將酒店名改做四海芳園,並且以後對所有人開放。呢件事成為當年轟動澳門嘅頭條新聞之一,自此四海芳園變成當時澳門居民最中意幫襯嘅地方之一。之後,陳芳仲係澳門創辦咗首家養殖荷蘭牛嘅牛奶公司。

陳芳後嚟返咗鄉下珠海,唔單止斥資起咗間大屋,即係宜家嘅陳家老屋,仲致力建設家鄉:買咗兩部柴油發電機供全村照明使用;喺澳門買水管,再將山泉水引到村入面過濾成自來水俾鄉親飲用;由村口一直到澳門海關嘅路亦係佢出資修築。

原圖為陳芳珠海故居。網上圖片