上個禮拜講起土瓜灣益豐大廈喺80年代發生水箱藏屍案,其實棟大廈之後再發生唔少案件,都咪話唔邪,其中一單仲要同「屯門色魔」林國偉有關添!

話說喺1992至1993年期間,林國偉多次喺屯門建生邨、友愛邨同大興邨強姦同殺害多名女性,於是有「屯門色魔」呢個稱號。後來佢為咗逃避追查,就由屯門搬咗去紅勵。但林國偉始終獸性難改,喺1993年5月,佢喺益豐大廈強姦一名23歲卡拉OK公關,之後竟然想同受害人做朋友,受害人摑咗佢一巴拒絕,結果林國偉一怒之下勒死女方。

林國偉同年8月喺土瓜灣美景街強姦咗另一名21歲受害人,事後仲同受害人講心事、希望大家做朋友,今次受害人就扮應承,之後再報警。警方就趁住林國偉約受害人睇戲嘅時候拘捕佢,林國偉最終被判8項強姦、7項行劫、3項謀殺罪成,被判終身監禁,餘生喺牢獄中渡過。

至於林國偉犯案原因,有報道話同佢嘅經歷有關。林國偉細細個時,媽媽就已經離家出走,爸爸就酗酒同有暴力傾向,令佢缺乏家庭溫暖,性格慢慢變得孤僻。據講林國偉曾經有過女朋友,仲去到談婚論嫁階段,點知女朋友拎咗林國偉7萬元「老婆本」走佬,令林國偉成日借酒消愁,最終犯下大錯。

原圖取自網絡。