第二次世界大戰期間，日本同美國喺太平洋硫磺島爆發一場慘烈嘅戰鬥，雙方造成嚴重傷亡，而呢場二戰最血腥戰役之一，名為

「硫磺島戰役」。

硫磺島位於東京南面約一千公里嘅太平洋，面積只有大約21平方公里。雖然硫磺島面積細，但對雙方嚟講有重要戰略價值，日軍當時利用硫磺島嘅雷達監察美軍戰機活動並通知東京，對美軍戰機構成一定威脅，而美軍一旦佔據硫磺島作為基地，空襲東京時將更有效率，於是美軍喺1944年10月決定派兵進攻硫磺島。行動最後延遲至1945年2月開始，當時美軍派出超過7萬人進攻，而日軍就只有2.3萬人死守。

由於雙方軍力懸殊，當時美軍預計用5日就能夠輕取硫磺島，但日軍不惜血戰，令美軍打足36日。當時有日軍被美軍包圍，有匿藏喺洞入嘅日本士兵拎住手槍、輕機槍、步槍向美軍掃射。美軍最後雖然成功攻佔硫磺島，但付出唔小代價：5500人陣亡、1.9萬人受傷，日軍就有2.2萬人死亡、1000多人被俘。

其中一名被俘日軍秋草鶴次後嚟回憶，當時壕溝裡面好似人間煉獄，好多日軍引爆手榴彈自盡，當美軍發現日軍匿藏喺洞入面嘅時候，就向洞內掟彈、倒石油點火，四肢五臟都被炸到散晒，佢仲話當時踩喺地上就好似踩落啲爛南瓜同番薯咁，可見當時戰況係幾咁慘烈。而激戰期間，6名美軍响島上豎起美國旗，幅相成為二戰經典時刻。

原圖取自網絡。