就算無睇過，唔少人都應該聽講過《馬可孛羅遊記》呢本書，內容主要講述威尼斯商人馬可孛羅（又譯馬可波羅）喺亞洲多國，特別喺中國嘅所見所聞。著名航海家哥倫布深受呢本遊記影響，原本諗住啟航到亞洲，點知誤打誤撞去咗美洲，仲發現埋新大陸。

講返馬可孛羅，早喺13世紀，威尼斯已經係中世紀時期東西方嘅貿易中心，威尼斯嘅商人會同貿易商互相交換貨物，有啲甚至會去中國，購入歐洲人渴求嘅奢侈品，而孛羅家族係有份遠赴中國嘅威尼斯商人，身為家族嘅一份子，馬可孛羅自幼接受良好嘅教育，除咗識母語威尼斯方言之外，仲識商業用嘅法文同意大利文。

1271 年，17歲嘅馬可孛羅跟隨父親同叔父起程到東方，令孛羅家族成為最早越過蒙古到達中國嘅旅行家。當時馬可孛羅稱呼中國為「泰西 Cathay」，佢喺中國遇到元世祖忽必烈，兩個人仲做咗莫逆之交。根據馬可孛羅嘅記載，佢曾被欽點為元朝嘅高官，仲曾經喺中國做過特別任務，同埋出使去緬甸、印度添。

馬可孛羅返到意大利之後，喺1298年參加威尼斯同熱那亞戰爭，不幸被俘。喺熱那亞監獄裡面，佢成日同獄友講述種種東方見聞，令周圍嘅人對東方產生咗強烈嘅興趣。後嚟，同樣被俘嘅作家魯思梯謙同馬可孛羅合作，於是就有咗呢本馬可孛羅口述、魯思梯謙記錄嘅《馬可孛羅遊記》。遊記詳細咁描述咗元初嘅政事、經濟文化、民俗風情、建築、戰爭、宮廷秘聞等，入面好多史實都可以同中國歷史上嘅事件對應。但係，對於馬可孛羅係咪真係嚟過中國，唔少人都持懷疑態度，例如馬可孛羅聲稱曾奉命治理揚州，但揚州地方志當中並無關相關記載。此外，遊記亦無提到中國最具特色嘅長城、印刷術、茶、漢字等，所以有人認為遊記裡面關於中國嘅所謂「見聞」，其實係由其他波斯商人口中聽返嚟嘅。講咗咁耐，唔知大家又點睇？

原圖嚟自網絡。