唔知大家有無睇過或者聽過一句經典廣告slogan：「金利來領呔，男人嘅世界」？呢個係品牌金利來香港80年代中後期嘅領呔廣告，而創立金利來嘅，就係香港中華總商會永遠榮譽會長曾憲梓。

曾憲梓生於廣東梅縣一個貧苦農民家庭，四歲喪父，細細個連飯都食唔飽，更加連書都讀唔起，要靠砍柴、放牛、耕田嚟幫補家計。後嚟有人見曾憲梓中意睇書，就送佢去梅縣東山中學讀書，資助佢完成中學課程，最後曾憲梓仲响廣州中山大學畢業。

1963年，曾憲梓去泰國定居，學識咗製作領呔嘅技術。五年後佢移居香港，靠住6000蚊創立「Goldlion」品牌，經營家庭式領呔生意。初初品牌中文譯名叫「金獅」，不過顧客覺得發音同「今輸」相似，唔好意頭，於是曾憲梓喺1971年將品牌改名做「金利來」。同年，中國乒乓球代表團應邀喺香港舉行表演賽，曾憲梓以「金利來」名義贊助香港電視台轉播。對於仲喺發展初期嘅「金利來」嚟講，三萬元嘅電視廣告費難以一次付清，要分期找數。不過呢一次大膽決策，就為「金利來」帶嚟意想不到嘅商業效果，「金利來」藉住乒乓球隊嘅精彩表演成功入屋，領呔嘅銷量迅速大增，之後嘅生意愈做愈大。

飲水思源，曾憲梓生意有成之後，開始回饋自己嘅鄉下，為母校捐建一座三層教學大樓、圖書館、大禮堂、運動場等。曾憲梓仲同梅州市對外經濟發展公司合辦咗銀利來公司，銀利來嘅一切收益，全部用喺家鄉建設。唔單止咁，曾憲梓旗下仲有教育基金、體育基金、載人航天基金、助殘研究基金，資助各項有需要嘅範疇，曾憲梓講過：「只要還拿得出來，我就要捐」。

原圖嚟自網絡。