睇返新聞，原來今年係警隊成立175周年，一於同大家講吓警隊嘅歷史同精彩故事。記得之前農曆七月介紹過Sammi鄭秀文、錢小豪同楚原等有份演出嘅電視劇《大頭綠衣鬥殭屍》，今日就同大家講講大頭綠衣同ABCD嘅故事。唔好以為打錯字，ABCD同大頭綠衣一樣，都係以前對警察嘅稱呼。

話說喺1920、1930年代，當時香港流行一首童謠：「ABCD，大頭綠衣，追唔到賊吹BB！」以前無對講機，警察遇到咩事就係靠呢個BB（警笛），呼喚附近嘅同袍或者民眾過嚟幫手。童謠裡面嘅「大頭綠衣」，係指以前著綠色制服、包住頭巾嘅印警同戴尖頂竹帽嘅華警。咁「ABCD」又係咩嚟呢？話說以前香港嘅警隊係根據唔同國籍去組成唔同部隊嘅，最初就得ABC三個，A代表歐籍人員，唔駛問阿貴梗係英國人地位最高，而B代表由印度招募嚟香港嘅印裔人員，而C就代表本地招募嘅人員。直至1923年，警隊又從山東威海衛招募人員來港，組成咗D部隊，齊集四個部隊ABCD。

呢個制度直至日本佔領香港嘅時候被取消，戰後重整警隊時，就喺ABCD之外加個J，用作識別佢哋曾經喺日佔時服務香港咁解。直至去到五十年代，先至全部取消晒ABCDJ。

原圖為電視劇《大頭綠衣鬥殭屍》及《收規華》劇照。