之前講過吓太平天國領袖洪秀全同佢班手下嘅事跡，見大家都好有興趣，今日一於再同大家講講洪秀全依位與眾不同嘅人物，同埋佢點樣對待班後宮「娘娘」。

洪秀全於嘉慶年間生於廣東花縣（現時廣州市花都區），佢喺廣州參加四次府試，四次都失敗而回，喺第四次參加府試嘅時候，接觸到由梁發所寫嘅《勸世良言》，從中得到啟發，自稱係上帝嘅細仔、耶穌嘅細佬，受上帝之命下凡誅妖，後來喺花縣創立「拜上帝會」，1851年喺金田起義，攻克18個省份超過600座城市，將江寧府（而家嘅南京）定為首都、建立政權。

古代大權在握嘅領袖，又點會無後宮？洪秀全有一大班妃嬪，依樣相信唔少史友都知，而根據佢嘅《天父詩》，洪秀全對班「娘娘」毫不憐香惜玉，會用仗責、「三年不發新衣」、困黑屋、斬手腳，以及「煲糯米」嚟對付同虐待班妃嬪。唔好以為「煲糯米」同煮飯仔有關，其實係種恐怖刑罰，有種講法話係將受罰者成身纏滿布條，然後淋油活活燒死，等同點天燈；另一種講法話受罰者會被綁住跪响一大煲水入面，再慢火連人帶水齊齊煲，直至臀部煮爛而死，可以話係非常變態。唔單止咁，《天父下凡詔書》記載，東王楊秀清曾經「借天父把口」嚟教訓洪秀全，責備佢用靴頭踢啲大肚嘅妃嬪，可見洪秀全有幾殘忍。

原圖為劇照。