早兩日講萬金油大王胡文虎，有史友想知多啲香港同新加坡虎豹別墅嘅現況，阿史依家找數喇。講講香港先，前幾日睇新聞見到，超過80年歷史嘅虎豹別墅係一級歷史建築，宜家已經活化成中西音樂學院——「虎豹樂圃」，將會喺4月正式開放。
虎豹別墅係由胡文虎同胡文豹兄弟喺1935年依山而建，據講 用咗成1,500 萬港紙，當時嚟講可以話係天文數字。棟別墅紅牆綠瓦，帶有中國園林嘅建築特點，又糅合西式佈局同裝飾，入面以「虎塔」同「18層地獄」最出名，七層嘅白色六角「虎塔」高44米，曾經係香港島上唯一嘅中國式塔樓。而「18層地獄」係別墅壁上嘅浮雕，主要描繪地獄入面受罰嘅情景，講出警惡勸善嘅道理。另外仲有唔少故事式嘅浮雕，例如《西遊記》情節、牛郎織女嘅故事等，相當生動逼真，雖然對小朋友嚟講幾恐怖吓，但都可以話係上一代香港人嘅回憶。
胡文虎嘅後人胡仙喺1999年將別墅地段以一億賣俾長江實業興建私人住宅，自此虎豹別墅正式關閉。2001年，政府同長江實業協議保留原有嘅虎豹別墅主樓，2013年由胡文虎慈善基金中標搞活化，政府亦都撥款1.65億元做工程費。活化後嘅別墅得返主樓同私人花園，曾經對外開放嘅萬金油花園同虎塔早就拆卸，真係幾可惜。好彩，新加坡仲保留咗另一個由胡文虎興建嘅虎豹別墅，歷史只係比香港版少2年，但佔地面積更大，入面除咗有地獄浮雕、中國各式神話雕像之外，仲有世界各地嘅景物風俗，好似自由神像、日本相撲手等。呢個虎豹別墅係免費開放㗎，有機會去新加坡嘅朋友唔好錯過喇。
原圖嚟自網絡。