早排講到包括東條英機在內嘅7個甲級戰犯，喺1948年12月23日被吊首處死，今次就再講埋另外一位甲級戰犯——土肥原賢二。

土肥原賢二生於軍人家庭，1912年陸軍大學畢業，第二年以參謀本部部員、陸軍上尉身份到北京，喺日本特務機關出任特務頭目嘅助理，展開喺中國長達30多年嘅間諜特務生涯。土肥原賢二長期喺中國生活，接觸社會各階層，並且識得講流利漢語，據講仲熟讀《三國演義》、《水滸傳》等名著，期間佢曾經出任奉系軍閥張作霖嘅顧問，但最終因為張作霖唔肯滿足日方嘅要求，同埋想擺脫控制，結果土肥原賢二就聯同關東軍高級參謀河本大作策劃皇姑屯事件，炸死張作霖。

喺1931年，土肥原賢二聯同日本關東軍策劃「九一八事變」，奪取中國東北。之後佢又安排末代皇帝溥儀到長春，建立偽滿州國呢個傀儡政權。盧溝橋事變之後，日本發動全面侵華戰爭，土肥原賢二奉命率領日軍入侵華北地區。後嚟日軍於1945年投降，駐日盟軍總部拘捕土肥原賢二，遠東國際軍事法庭確認佢犯下侵略戰爭罪和戰爭陰謀罪，判處死刑。1948年底，土肥原賢二喺抽籤之下，成為第一個受刑嘅甲級戰犯，率先命喪絞刑台。

原圖嚟自網絡。