中國古代四大美人之前就講咗三個，今日點都輪到最有「份量」嘅楊貴妃喇。點解話佢有「份量」，皆因一個四字詞「環肥燕瘦」，「燕」指西漢時期有名嘅美女趙飛燕，佢體態輕盈，身輕如燕，相傳佢瘦到可以喺人嘅手掌上跳舞。而楊貴妃楊玉環就同趙飛燕嘅體態相反，即係肥喇。楊貴妃究竟有幾肥，阿史就唔知喇，不過可以肯定佢生得幾靚（請參考唐代審美標準），靚到連花都自慚形愧。

楊貴妃一向受唐玄宗寵愛，傳說有日唐玄宗約咗楊貴妃喺百花亭相聚。於是楊貴妃早早去咗百花亭做準備，點知等嚟等去，都等唔到唐玄宗。後尾先知原來唐玄宗忘記咗同佢嘅約定，已經去咗第二個妃子嘅宮殿。得知真相之後，楊貴妃梗係又嬲又妒忌，開始借酒消愁，幾杯酒落肚，貴妃不勝酒力，已經有啲醉態。佢本身就生得好睇（請繼續幻想自己身處唐代），醉咗之後臉色紅潤，更顯媚態。而百花亭啲靚花見識到楊貴妃嘅美貌，紛紛將花瓣收起，羞於同貴妃比美，因此流傳「羞花」嘅典故。而楊貴妃醉酒呢件事後嚟亦被改成京劇經典曲目《貴妃醉酒》，又叫做《百花亭》。

圖為向海嵐及梅蘭芳飾演嘅楊貴妃。原圖嚟自網絡。