民國時期嘅傳奇女子多不勝數,有「鏗鏘玫瑰」之稱嘅鄭毓秀亦都係其中一位,佢能文能武,既係行刺袁世凱嘅殺手,又做過中國第一位女律師,令人印象深刻。香港跑馬地嘅毓秀街,就係以佢嚟命名。

鄭毓秀喺現今深圳嘅官宦之家出世,屋企禮教觀念濃,自細實離唔開「三從四德」呢類規條。不過佢天生反叛,唔紮腳唔背經文,連祖母為佢訂下嘅婚事都可以自己解除。鄭毓秀咁特立獨行,不為當時人所容,逼到佢要離家出走,同姐姐去日本留學。亦都因為咁,鄭毓秀接觸到孫中山嘅同盟會,之後開始從事革命活動。辛亥革命期間,鄭毓秀多次為革命黨秘密運送軍火、傳遞情報,仲曾經參與過刺殺行動,而佢第一個刺殺嘅對象,就係打算復闢帝制嘅袁世凱。

從事革命活動好幾年,鄭毓秀發現空有一腔熱血而無先進嘅知識同技術都無用武之地,於是去咗法國留學,成為中國史上首位法學女博士。根據鄭毓秀嘅自傳《玫瑰與槍》所述,佢响1919年巴黎和會舉行前夕,同幾百個華人包圍中國代表所下榻嘅酒店,要求佢哋唔好於和約上簽字,以免原本被德國強佔嘅山東半島權益劃歸日本。鄭毓秀當時隨手喺附近摘咗枝玫瑰,收埋喺衣袖,扮係槍指住中國代表團團長陸徵祥,威脅「你要簽字,我就用這槍殺了你。」中國代表嘅立場係咪受一枝玫瑰左右,多年來有唔同解讀,不過最終中國代表無响和約上簽字,保留咗收返山東嘅權利。

1926年,鄭毓秀同後嚟嘅丈夫魏道明於上海開設律師事務所,為華人爭取權益。身為中國首位女律師,佢經手嘅案件包括京劇大師梅蘭芳同「冬皇」孟小冬嘅離婚案。鄭毓秀本人咁犀利,佢嘅後人都唔弱, 83年版《射雕英雄傳》入面嘅穆念慈、九十年代成日响台慶同慈善騷做高難度表演嘅女藝人楊盼盼,就係鄭毓秀嘅外孫女。

圖為鄭毓秀及《法蘭西歲月》嘅鄭毓秀。原圖嚟自網絡。