二戰期間，日軍侵佔香港之後大量發行軍票，禁止使用同私藏港元，又以好高嘅兌換價嚟逼香港人兌換，吸乾大眾嘅血汗錢，然後拎去其他地方買軍火等物資。

《香港淪陷史》入面提到，當時日軍大肆搜查，一旦發現有人私藏港元，就會對佢用酷刑，包括毒打、灌污糟水、剝指甲等等，有唔少人頂唔住而無命。此外，戰局惡化、物資短缺，再加上日軍不斷印軍票，令到物價急速上漲，香港市民亦只能默默忍受。

日本喺1945年8月15日無條件投降，同年9月16日宣布所有軍票作廢，港英政府亦恢復港元為法定貨幣，軍票頓時變成廢紙，過咗咁多年日本依然唔肯贖返呢啲軍票。喺1968年，一班香港受害者成立咗香港索償協會，登記後發現3500個家庭共持有5.4億日元軍票。協會主席曾經講過，當年跑馬地一棟三層嘅樓要八千蚊，經過50年通脹，1蚊軍票應該可以兌換500倍日元。一大堆廢紙般嘅軍票，背後係一筆非常龐大嘅欠債。

原圖嚟自網絡。