相信唔少史友週末一朝早都會好有心或被逼咁坐定定，陪長輩或者姨媽姑姐叔伯兄弟飲茶。記得細路嗰時，因為唔懂事而踩中「陷阱」，觸犯飲茶禁忌，唔少仲係同筷子有關添，唔知大家有無中過招？

講筷子之前，先講杯茶。除非自己飲茶，否則無論小朋友定大人，去飲茶都會有人斟茶俾你飲，但到底應該用咩手勢多謝人哋？秘書妹妹加把口，話通常用一隻手指輕叩枱面，多謝長輩。相傳依個習俗源於古代皇帝微服出巡時，唔想被人發現身份，飲茶期間斟茶過大臣，無得跪低嘅大臣只能夠用手指當膝頭嚟「聊表心意」。其實用幾多隻手指表示謝意，係視乎邊位斟茶過你嘅，如果平輩就用兩隻手指，後輩就用一隻，至於長輩，係要用曬成個拳頭，以示尊敬。

飲啖茶自不然要食個包，跟住又想拎電話打機（舊時玩其他嘢，包剪揼都可以玩咗一個上晝），自不然好順手咁將對筷子一插，出事喇。呢個情況相信唔少人都手快快做過，對筷子插咗喺食物上面，成個畫面就好似拜神上香咁，慘痛嘅結果真係想唱返句「我想哭」。

相比「上香」，用筷子「執骨」就更慘情。如果對方夾點心或夾餸俾你，應該用手捧住隻碗嚟接，一定唔可以用筷子接，因為火化場職員先至會用長筷子夾起啲骨俾子孫傳入骨灰盅，所以筷子傳筷子，千祈咪亂試。

以上幾項但凡中招，俾長輩鬧已經係小兒科，一對筷子打落嚟就真係銘心刻骨，奉勸大家飲茶時要好似麥兜廣告咁，得正正係度，坐定定係度，禁忌唔好做。

原圖嚟自網絡。