葵涌警察宿舍喺1987年4月發生一家四口離奇滅門慘案，案發地點仲要喺正差館隔離，令警方大為緊張，到底係咩人咁大膽，响太歲頭上動土？單案嘅來龍去脈又係點？

喺4月7日上晝，同事上門搵其中一個死者鄭炳和（舊名鄭國平）飲茶，見到大門虛掩兼傳出陣陣臭味，隨即報警。法醫到場之後，發現鄭炳和額頭同頸部中刀，後腦同胸前都有好長嘅血痕，法醫助手接觸屍體時突然觸電，原來伏屍嘅雙人床嘅鄭炳和，背後壓住一條電線，死狀離奇。而鄭太李鳳鳴個頭幾乎被斬甩，頸大動脈遭割斷。至於佢哋11歲同5歲嘅仔女，就被斬到血肉模糊，法醫仲話兩個細路肌肉神經收縮，相信死前目睹父母被殺過程而嚇到成個人震晒。

警方喺現場搜出一張用毛筆字寫嘅字條，寫住「鄭國平欠借貴利唔還，攞你命，貴利王包殺。」警方一度循大耳窿方向追查，發現鄭炳和曾經借過大耳窿錢，但早已經清還，於是就懷疑有人想嫁禍大耳窿。而「鄭國平」呢個名鄭炳和已經無用幾年，再加上喺現場搵唔到字條所用嘅紙同墨，所以警方相信兇手應該係熟人，而字條係一早寫好再帶去兇案現場。

後來鄭炳和嘅舊同事阿偉向警方提供線索，原來鄭炳和夫婦於案發前一年出現感情問題，李鳳鳴仲曾經喺出面同一個叫黎新來嘅男人同居。警方追查之下，確認黎新來就係兇手，當時李鳳鳴同黎新來諗住設置一張電床殺死鄭炳和，並嫁禍俾大耳窿，但點知落手之後，細仔突然發開口夢，叫咗聲「媽媽」，黎新來以為小朋友目擊行兇過程，就斬死佢，李鳳鳴嚟唔切阻止，黎新來一不做二不休，殺埋李鳳鳴嘅大女。李鳳鳴見到瘋狂嘅黎新來，就衝入廚所攞刀斬人，中刀嘅黎新來充滿怒火還擊，幾乎斬甩李鳳鳴頭部。鄭炳和一家四口咁就死喺黎新來嘅刀下，最終黎新來三項謀殺及一項誤殺罪成，被判死刑，1990年改判終身監禁。

原圖取自網絡。