上次講起日本甲級戰犯土肥原賢二喺1931年聯同關東軍策劃「九一八事變」，奪取中國東北，又搵咗清朝末代皇帝溥儀，建立偽傀儡政權滿州國，今次不如講多少少。 

九一八事變後，日本關東軍為咗可以將佔領東北三省嘅行為「合理化」，以及平息當地民眾不滿，於是就諗住搵溥儀出面鎮住個場面，建立「滿州國」，但就因為得唔到大眾以至國際社會承認，而被稱為「偽滿洲國」。

喺1932年3月1日，日本以滿州國政府名義發表《建國宣言》，宣佈「滿州國」成立。溥儀被安排前往長春，於3月9日出任「滿州國執政」，年號改為大同，並簽訂《日滿議定書》，出賣東北主權。直至1934年3月1日，溥儀登基稱帝，年號改為康德，佢亦稱為康德皇帝。即位嘅時候，溥儀希望著龍袍登基，但被拒絕，關東軍聲稱溥儀係滿州國皇帝，而唔係大清國皇帝，雙方各不相讓，最終溥儀就喺登基告天禮上著龍袍，不過正式登基典禮就著返大元帥正裝，由此可見當時溥儀係幾受制肘。當時日本昭和天皇安撫又好，做騷又好，總之送咗架轎車過溥儀，作為佢「登基」嘅賀禮。

雖然溥儀再次成為所謂嘅皇帝，但所有重大決定，包括軍事、人事等等，都要得到關東軍嘅批准。隨著1945年8月日本戰敗，溥儀喺8月17日晚宣讀《退位詔書》，偽滿洲國正式滅亡。

原圖取自網絡。