阿史近排重溫返幾十年前嘅舊戲《珠光寶氣》(Breakfast at Tiffany's),又再一次被女主角柯德莉夏萍電親。柯德莉夏萍喺戲裡面著嘅黑色小禮裙,簡直可以話係時尚界嘅經典,到宜家依然有唔少明星效仿。

柯德莉夏萍生於1929年嘅比利時,後嚟父母離婚,佢跟住貴族母親離開英國,移居荷蘭。戰後柯德莉夏萍做咗電影演員,第一次擔正嘅電影《羅馬假期》,就令佢先後獲得奧斯卡同金球獎影后。而佢後來演出過嘅電影《窈窕淑女》、《甜姐兒》、《珠光寶氣》等,都成為荷里活嘅經典。除咗演技之外,柯德莉夏萍更憑住佢高雅、簡約嘅穿著品味風靡全球,喺世界各地掀起咗一股熱潮,而呢股熱潮嘅背後多得Givenchy嘅同名創辦人。Givenchy一手打造柯德莉夏萍果條經典小黑裙,後嚟仲成為柯德莉夏萍欽點嘅「御用時裝設計師」。

唔講唔知,傳記作家Matzen話柯德莉夏萍曾經於二戰嘅阿納姆戰役中,以醫生助理嘅身份加入抵抗組織,對抗德國納粹入侵。呢件事唔係咁為人所知,其中一個原因源自家庭壓力,據稱柯德莉夏萍嘅爸爸信奉法西斯主義,媽媽就有親納粹傾向,令身為囡囡嘅柯德莉夏萍唔敢公然反對納粹。但係,納粹殺害咗柯德莉夏萍嘅叔叔,對柯德莉夏萍造成咗巨大嘅心理創傷,致使佢決心加入志願軍抵抗納粹。柯德莉夏萍嘅兒子多蒂透露,媽媽好少講係荷里活嘅生活,反而會講返荷蘭嘅生活,佢所講嘅童話故事中並無紅地毯,反而係二戰嘅往事。

原圖嚟自網絡。