好心同警戒心同樣重要。喺1989年,16歲女學生阿華諗住好心幫鄰居,但竟然死喺對方手上,仲要被肢解、烹屍,真係慘無人道!

話說喺1989年1月30日,喺九龍城一間中學讀中五嘅阿華放學,返去牛頭角上邨第9座嘅屋企途中遇到住喺11座、58歲嘅退休清潔工馬安。依位陌生嘅鄰居當時自稱唔識字,想請阿華上佢屋企,幫手填回鄉證申請書。阿華最初唔肯,但喺馬安苦苦哀求之下,最後應承咗,從此人間蒸發。

當晚半夜,同樣住喺11座嘅警察嚴sir返歸,見到鄰居馬安屋企門口有兩個染上血漬嘅膠桶,起初嚴sir估計可能係動物血,所以無為意,但之後嚴sir喺窗口見到馬安拎住啲膠桶落樓下露天垃圾站,又刻意用其他垃圾遮住,所以對馬安起咗疑心。嚴sir落去一睇,竟然發現有骨頭同肉塊,覺得唔對路所以報警。

警方到場之後,喺馬安屋企廚房發現一具無頭、無四肢、無乳房嘅女屍,又喺垃圾站搵返十幾袋裝住死者個頭、手、腳肉碎同骨頭嘅膠袋,有啲仲要溝埋番茄、薯仔等湯料。馬安被捕之後承認殺害阿華,又話阿華當時上佢屋企之後因為驚所以想走,又拒絕幫手填表,結果嬲嬲地就殺死阿華。馬安辯稱自己無心殺阿華,不過糾纏期間被女方抓面又咬手,佢出於自衛先至捏死阿華。經過審訊,馬安最後謀殺罪成,被判處死刑,到咗1991年改判終身監禁。

原圖取自網絡。