之前講開李君夏係香港警隊首位華人「一哥」，今次不如講埋警隊其他「第一」喇。

根據警隊資料，原來早喺1843年，即係警隊正式成立之前1年，已經有華人督察㗎喇，大名叫做楊佐。或者史友會問點解未正式成立警隊都有警察？係因為喺1841年英國佔據香港島初期，治安唔係咁好，香港首任行政官義律喺1841年5月1日委任咗堅偉上尉組織警隊維持治安，但由於《穿鼻草約》未經中英兩國君主簽署，所以當時成立嘅警隊係缺乏法理依據㗎，直至1844年警隊先至算係正式成立嘅。

講返警察，除咗楊佐之外，另一位華人警察方奕輝都唔小嘢。話說喺二戰之後，警隊增加唔少華人督察級人員名額，喺1954年佢就成為咗警隊首位華人總督察。唔止咁，佢之後仲分別喺同一年、1957年、1966年同1968年，先後成為首位華人助理警司、警司、高級警司同總警司添！

原圖取自網絡。