今晚年三十晚,好多家長都會放封壓歲錢响小朋友枕頭底,等佢哋平平安安。原來壓歲錢嘅「歲」讀音同鬼鬼祟祟嘅「祟」差唔多,所以取其壓制邪祟,擋災避厄嘅意思。講開又講,大家知唔知壓歲錢嘅習俗點嚟?最初放啲咩响入面?

據講壓歲錢嘅習俗早於漢朝已經出現,當時並非放啲錢幣入去,而係佩戴一嚿錢幣形狀嘅辟邪物品,寓意係鎮壓邪祟。去到清朝,壓歲錢先正式變成過年嘅習俗,根據清代《燕京歲時記》所講,「以彩繩穿錢,編作龍形,置於牀腳,謂之壓歲錢」,即係話會用繩串住銅錢並放响床腳。民國之後,壓歲錢多數係一百文銅錢,用紅紙包住,同現代版壓歲錢類似。

講完一大輪,究竟要擋、要避、要KO嘅「邪祟」係咩?有講法話古代有隻祟獸,過年時會去摸小朋友個頭,被摸完就慘慘豬囉,會變蠢,所以有一家人放咗壓歲錢响小朋友枕頭底,諗住趨吉避凶。後尾祟獸想摸頭時,突然被枕頭下嘅銅錢光嚇走咗,搞到啲人爭相仿效。信又好唔信又好,俗語都話「有前使得鬼推磨」,為咗小朋友嘅未來同幸福著想,壓歲錢一放無妨,大家準備咗未呀?

原圖嚟自網絡。