喺七、八十年代，北韓曾經綁架過唔少南韓人，當中包括兩屆亞洲影后、南韓著名演員崔銀姬同佢嘅導演老公申相玉，佢哋兩個當年分別嚟到香港，同樣不知不覺地人間蒸發。

喺1978年1月中，崔銀姬由漢城（現今首爾）飛到香港，諗住同人傾工作，點知佢缺席香港嘅電影界聚會、酒店電話無人聽，而酒店執房職員亦發現佢多日無返房，甚至佢同朋友約定返南韓嗰日，依然不見蹤影。去到二月頭，南韓領事館報警，於是香港警方著手調查，發現崔銀姬無出境記錄、酒店行李無證件等，十分離奇。其後，佢前夫申相玉喺同年7月到香港協助調查，竟然於淺水灣突然失蹤。

原來崔銀姬有晚響尖沙咀行街，無端端被幾個大漢夾走同笠麻包袋，輾轉運上大船，期間被注射鎮靜劑，最終抵達北韓。至於申相玉被綁架嘅經過類似，後嚟兩人發現綁架案嘅策劃者，正正就係當時仲未成為北韓領袖嘅金正日。金正日係電影迷，崔銀姬見過佢有兩萬套電影嘅私人收藏庫，佢搵人捉崔銀姬同申相玉，就係想二人幫手發展電影王國。至於想拍咩戲？金正日舉例：《第一滴血》、《黑色星期五》同007系列，等兩人做參考。

崔銀姬同申相玉一共被迫留喺北韓8年咁耐，期間製咗二十幾部電影，當中《不歸的密使》更參加過第14屆莫斯科影展，而佢兩個喺北韓期間復婚，重新成為夫婦。到咗後期，佢哋贏得金正日嘅信任，獲批准出國，只不過身邊就有一啲「指導員」跟實。直至1986年3月，佢哋出席維也納電影節，搭的士嗰時，架的士同後面指導員架車被隔開，佢哋把握機會叫司機衝去美國大使館尋求政治庇護。崔銀姬最後於去年4月離世，終年91歲，結束傳奇一生。

原圖取自網絡。