新年大家貼咩揮春？出入平安？心想事成定財色兼收？據講揮春同春聯嘅原始版本稱為桃符，同之前講門神歷史提到嘅兩位神仙神荼同鬱壘有關，兩位神仙响桃樹之下震懾百鬼，仲會將唔聽話嘅惡鬼綁嚟餵老虎。因為神荼同鬱壘又惡又正確，所以古代人會响門口掛桃花樹枝同埋刻有神仙名嘅桃木板（即係「桃符」），希望驅走啲妖魔鬼怪。慢慢越嚟越多人使用紙張，樹枝同木板就被取代，變成喜慶嘅紅紙。

至於揮春同春聯嘅普及，要多得明朝開國君主朱元璋。據講佢當年定都金陵，下令全國人民年初一都要貼揮春响門口，仲講明自己會微服出巡，暗示邊個夠膽唔做就無好下場。朱元璋出巡嗰陣，見到有戶人家唔聽話，無貼到。隨從話嗰戶人家劏豬維生，太忙先無整到。

朱元璋突然興致大發，命人磨墨備紙，寫下「雙手劈開生死路，一刀割斷是非根」嘅皇帝墨寶，送畀屠戶。之後朱元璋返歸途中行過同一戶劏豬人家門前，發現副春聯根本無貼出嚟，自然嬲到震，衝去問點解。唔好睇小屠夫，對方好醒咁話，皇帝墨寶要有尊貴待遇，必需於內堂燒香供奉。識講嘢自然有好運，屠夫一句話唔單止氹掂朱元璋，仲獲得幾十兩銀賞賜，開心過肥年。

原圖嚟自網絡。