平時過馬路，有時都會見到斑馬線，不過原來香港斑馬線嘅歷史唔係好耐㗎咋。斑馬線最初係喺英國嗰邊發明嘅，無幾耐政府就將佢引進香港，等啲市民可以安全咁過馬路。

咁香港第一條斑馬線到底喺邊？話說香港條斑馬線嘅選址同一個人有好大關係，佢就係交通部警員谷迅昭。當時佢幫手研究斑馬線放喺咩位好，中環？交通繁忙但十字路口都有人指揮交通，唔適合。灣仔莊士敦道電車路？馬路中心有月台，過路者可以稍作停留，過馬路並唔難，同樣並非合適選擇。

谷迅昭後嚟去到軒尼斯道修頓球場外面，發現嗰度無電車道，馬路闊，左右兩邊離十字路口遠，唔少人貪方便，直接從中間穿過，險象橫生，佢認為嗰度係設置斑馬線嘅最佳選擇。當局接納佢嘅意見，真係整咗條斑馬線。為咗引導啲行人去行斑馬線過馬路，當局就派咗幾個警察，包括谷迅昭在內，著便服扮行人係咁過馬路，又提醒啲行人唔好亂咁過，真係少啲耐性都唔得。

圖片為1958年身穿便服嘅谷迅昭（左二）示範用斑馬線過馬路。原圖嚟自網絡。