新年要睇賀歲片，之前講完富貴逼人系列，今日講埋家有囍事。經典就係經典，「無定向喪心病狂間歇性全身機能失調症」、「巴黎鐵塔反轉再反轉」、「醉拳甘迺迪」、打麻雀嘅「你居然收埋四條底褲」，同埋搭的士嘅「乜又係你呀？陳生」等，套戲啲金句真係打到阿史手軟。講開又講，大家知唔知最初三兄弟嘅人選仲有發哥周潤發同林子祥？

套戲嘅監製兼扮演大佬常滿嘅黃百鳴講過，原本三兄弟係由林子祥做大佬，佢自己就係女性化嘅二佬，拍住男性化嘅無雙表姐吳君如，而三弟就係張國榮，同張曼玉做拍檔。不過意外嘅嘢又點預計到，林子祥美國嘅物業突然火燭，有排搞，套戲就被逼換人。

黃百鳴當時搵周潤發頂檔，點知對方拍《我愛扭紋柴》，係對打台嘅賀歲片，唔駛問梗係唔得。後嚟黃百鳴就揀咗啱啱冒起嘅周星馳，星爺當時話想同張曼玉做對手戲，不過被黃百鳴拒絕，話嗰角色係張國榮嘅，叫星爺揀做大佬或者女性化嘅二佬，卒之星爺揀做花心大佬。

不過現實真係峰迴路轉過啲劇情，張國榮第一次見黃百鳴，就話唔好同佢爭，佢要做女性化嘅二佬，仲點名要拍住毛舜筠，話兩個人嘅合作「一定贏」。哥哥開到口，邊個唔應承？最後黃百鳴滿足埋星爺嘅願望，等對方拍住張曼玉，而佢自己就做花心大佬。

女明星方面，吳君如嘅角色程大嫂都勁搶鏡。其實佢一開始係做無雙表姐，不過經過一輪角色大兜亂之後，吳君如就變咗做黃百鳴老婆，搞到佢抗議話自己已經準備好曬，點變個賢妻良母款出嚟？黃百鳴建議吳君如做「搞笑版白燕」，仲加咗啲唇毛過吳君如，出嚟嘅效果都好入型入格兼爆笑滿分。

原圖嚟自網絡。