噚日就係情人節,唔知史友點過呢?阿史今日就分享一宗同情人節有關嘅奇案。話說喺1991年情人節嘅前夕,尖沙咀金域假日酒店嘅大堂副經理林文達,正準備同新婚太太阿嬋度過婚後第一個情人節。當日林文達突然喺公司收到一份鞋盒咁大、用精美包裝紙包住嘅禮物,佢好自然認為呢份係太太送嘅驚喜,而其他同事見到佢份禮物,亦自自然然走埋去趁熱鬧。

點知,林文達一拆開份「禮物」,係一個黐咗利是封嘅金屬盒,佢一拆,居然發生大爆炸!林文達全身著火,由辦公室衝酒店大堂,當時酒店大堂亦因為爆炸聲而非常混亂,呢個時候酒店保安同幾個外籍遊客上前救熄林文達身上嘅火,而林文達就燒到燶晒、眼白滿佈紅筋,連頭髮都鬈埋,唔少當時趁熱鬧嘅同事亦都燒傷。

警方調查期間,有個私家偵探報料,原來阿嬋個前男友吳健明曾經搵佢查過阿嬋嘅老公究竟係邊個,當時吳健明仲講過要整炸彈炸林文達,而警方之後喺吳健明屋企搜到炸彈製作工具。其後發現,原來吳健明同阿嬋仲拍緊拖嘅時候,係吳健明有第三者在先,阿嬋先同佢分手。負責調查嘅總督察就話,吳健明佔有慾非常之強,警方喺屋裡面仲搵到吳健明「收藏」同阿嬋以前用過嘅安全套、底褲同紙巾,認為吳建明係受唔到分手嘅打擊而報復。吳健明最終被判意圖謀殺、引致爆炸危害他人生命及財產罪成,被判監30年,上訴獲減刑至20年。

原圖取自網絡。