香港以前唔少警署都會有「師爺」當值，而「師爺」其實即係文員，負責翻譯、打告票同其他文書工作。不過千祈唔好睇小師爺，佢哋好多都有豐富經驗，熟悉警察工作，警員遇到唔同困難都會走去問師爺，所以啲師爺嘅地位真係唔低㗎！

傳聞，以前油尖區就發生過一宗趣事，有個資深師爺唔知咩事同一間舞廳過唔去，佢覺得間舞廳唔俾面佢，於是返到警署向班同僚訴苦。班同僚知道之後，收工就去嗰間舞廳每人坐一枱，但要求同一個舞女「坐枱」，結果一個舞女要招呼幾十人，真係頭都暈！舞廳經理知道之後心知大鑊，最後要向嗰位師爺設宴道歉，先至平息件事。所以話，以前啲師爺唔得罪得㗎！

原圖為油麻地警署，取自網絡。