喺1997年2月19日,被譽為「中國改革開放總設計師」嘅鄧小平因病逝世,享年93歲。喺佢任內,除咗領導中國改革開放之外,亦為中美關係正常化發揮決定性作用。中美兩國喺1979年1月1日建交,當時係國務院副總理嘅鄧小平喺1月28日,亦即係當年嘅正月初一,對美國展開9日嘅正式訪問,而呢一次亦都係中華人民共和國建國以來首位領導人訪美。訪問期間,佢同夫人卓琳走遍華盛頓、亞特蘭大、休斯敦和西雅圖等大城市。

喺鄧小平訪問華盛頓期間,佢出席過白宮國宴、向林肯像獻花、見過美國前總統尼克遜同前國務卿基辛格等。美國總統卡特其中一日安排咗場演出,而最後嘅節目就係搵嚟大約200個美國學生唱中文歌,鄧小平好感動,走上台親吻啲小朋友。之後佢又喺休斯敦附近睇牛仔表演嘅時候戴上闊邊牛仔帽,成為中美友好關係嘅象徵一幕。

圖片為鄧小平戴上闊邊牛仔帽一幕,取自網絡。