唔知大家近年仲睇唔睇TVB嘅台慶show？雖然每年都會有啲新環節，但令人印象深刻嘅就少之又少。當年肥姐沈殿霞踩雞蛋，再喺雞蛋上面挑戰穿過呼啦圈嘅經典環節，大家仲記唔記得呢？

雞蛋易碎，而肥姐又係娛樂圈入面比較有「份量」嘅藝人，要表演踩雞蛋又要確保雞蛋唔爛，都真係幾有睇頭。87年台慶當晚，超過200磅嘅肥姐挑戰一排排唔同層數嘅雞蛋，肥姐每上一層，都會先用單腳企穩，再用另一隻踩上去平衡。睇住啲雞蛋層係度郁，真係一步一驚心，觀眾都超緊張啲雞蛋會唔會被踩爆或者肥姐一個失重心而跌落嚟。

不過講到最令阿史睇到眼都唔眨眼嘅，都係最後肥姐喺雞蛋上面穿呼啦圈呢幕。肥姐企喺上面已經令人覺得好牙煙，佢仲要穿過一個直徑仲細過佢臀圍嘅呼啦圈，睇住肥姐邊顧住平衡邊盡力將個呼啦圈穿過自己嘅身體，真係有小小戥佢擔心。好彩，雖然過程有小小辛苦，但最後肥姐都成功完成挑戰，一隻雞蛋都無爛到，認真精彩。

轉眼間，一直為香港人帶嚟歡笑嘅「開心果」肥姐已經離開咗我哋11年，但佢洪亮嘅笑聲，直到今日諗返起都依然歷歷在目。

原圖嚟自網絡。