「我係驃叔,你唔係;我講馬,你要聽。」依句係演員兼馬評家驃叔董驃嘅金句,佢風趣幽默,講嘢到肉,唔單止講馬,佢仲拍過《警察故事》、《富貴逼人》系列等經典電影,令觀眾留下深刻印象。

董驃三代都同馬結下不解緣,佢嘅爺爺董炳友係香港首位華人練馬師,而董驃1933年响渣甸山嘅怡和馬房出世,所以連個名都同馬有關。報道話董驃8歲開始騎馬,佢後嚟仲成為騎師同練馬師,認真威水。

六十年代開始,驃叔去麗的電視做賽馬節目主持,佢分析得好專業,又夠風趣,仲會批評騎師或者賽馬會,令唔少馬迷好中意聽到佢把聲。 除咗馬場,當年娛樂圈都唔少得驃叔。驃叔拍過《大地恩情》、《霍元甲》等電視劇,計埋《富貴逼人》、《紅番區》等電影,佢參演嘅影視作品超過200集/套,當中唔少內容同情節都非常精彩。

踏入千禧年之後,驃叔慢慢淡出幕前。2006年2月驃叔唔舒服入院,病情急轉直下,22號夜晚電視直播夜馬賽事,報道話驃叔屋企人刻意校大電視聲量,希激勵激驃叔嘅生存意志,等到最後一場到場馬跑完,驃叔安詳離世。

驃叔雖然離開咗大家,不過佢唔少金句都好有智慧,一於同大家重溫吓:

■「無料嘅人無人扶得起,有料嘅人無人撳得低。」

■「大事要清楚的講,小事可幽默的講,無把握的事要謹慎地講。」

■「別人的事最好唔講,自己的事聽聽自己的心怎樣講。」

■「不勞而獲無道理,勞而不獲無天理。」

■「交一友要千言萬語,失一友只三言兩語。」

原圖嚟自網絡。