近排睇返《古惑仔》系列電影，除咗靈魂人物浩南哥鄭伊健之外，仲有山雞陳小春、巢皮/蕉皮朱永棠、大天二謝天華等都係經典角色。咁唔知大家又記唔記得，原來朱永棠（風）、陳小春（火）、謝天華（海）曾經組成過跳唱組合風火海。

風火海92年啱啱出道無幾耐，就有份參與天后林憶蓮嘅《天地野花1993情撼紅館》演唱會，仲同憶蓮合作錄製《震撼》、《相愛時候到了》，初出道就同天后同台演出，認真幸運。兩年之後，風火海喺新城勁爆頒獎禮上，一舉奪得「新登場組合」金獎同商台叱吒「樂隊組合」銅獎，都叫做有啲成績同好嘅開始。不過風火海嘅星途唔係咁順暢，佢哋曾經手頭拮据，喺窮途末路之際，走去參演電影《古惑仔之人在江湖》。自此之後仲連續拍埋《古惑仔2之猛龍過江》、《古惑仔3之隻手遮天》、《97古惑仔之戰無不勝》，可以話係古惑仔電影系列嘅元老級人馬，風火海嘅星途亦因為電影效應而再度出現起色。

之不過，古惑仔電影嘅影響力都阻止唔到風火海解散。2000年，風火海脫離星工廠，而陳小春、謝天華加盟中國星集團。組合入面得返陳小春仲有繼續有新專輯發佈，好似《獻世》、《算你狠》、《取消資格》等。至於謝天華隨後加入咗TVB，轉型成演員，參與演出《真情》、《皆大歡喜》等劇。去到2009年，謝天華更憑電視劇《學警狙擊》入面嘅Laughing哥一角爆紅。而朱永棠喺風火海解散之後都有加入TVB拍劇，不過觀眾緣就遠遠唔及謝天華，近年專注從商。2017年，相隔差唔多20年無合作嘅風火海三人拍攝電影《孤戰》，再度合體，重溫當年嘅友情歲月。

原圖嚟自網絡。