阿史間中都會留意吓娛樂消息，呢排見到新聞講當年嘅兒童節目主持李天翔同蓋世寶今年都會離開TVB，令唔少觀眾覺得好可惜。或者史友醒唔起李天翔係邊個，阿史提吓大家，佢就係「認字特警」喇！

李天翔喺1995年考入TVB藝員訓練班，入行之後佢最先被派去做兒童節目主持，《閃電傳真機》同《至Net小人類》都有佢份。後嚟佢轉咗去戲劇組，由兒童節目主持搖身一變成為大反派，演過唔少強姦犯，喺劇中被佢「強姦」嘅女星多到數唔晒，包括姚子羚、胡定欣、唐詩詠、李思欣、李佳芯、馮盈盈等等，搞到佢出街都被人鬧，又被網民改花名叫佢做「御用強姦犯」。

不過佢曾經接受訪問，就話自己其實唔好受，覺得好尷尬，因而萌生退意。早前佢就宣布今年5月離開做咗23年嘅TVB，去外面發展，希望得到更多機會。

原圖為節目截圖，取自網絡。