之前講到武俠小說家梁羽生嘅事跡，今日繼續講講佢同另一位武俠小說界泰山北斗金庸當年嘅恩怨。上次講到梁羽生嘅第一部武俠小說《龍虎鬥京華》面世之後，大受歡迎。金庸當時都係《新晚報》嘅編輯，亦大讚《龍虎鬥京華》「好看，很精彩」。不過，自從梁羽生嘅第二部武俠小說《草莽龍蛇傳》連載結束之後，由於梁羽生人在北方暫時無法寫稿，所以《新晚報》嘅總編羅孚就搵嚟金庸頂上，從而造就咗另一位武俠大家。金庸小說大受歡迎，梁羽生無妒忌佢，反而話「我是全世界第一個知道金庸比梁羽生寫武俠寫得更好的。」

《新晚報》前後出咗兩位武俠小說家，外界難免會將兩人拎嚟比較一番，金、梁二人之後亦展開咗一場「筆戰」。事源係1966年梁羽生以筆名「佟碩之」發佈咗一篇《金庸梁羽生合論》，內容主要係比較金、梁二人嘅不同，仲喺文章度指出《射鵰英雄傳》入面，身為南宋人嘅黃蓉竟然唱元曲，有時空倒置之感。隨後金庸又登咗篇《一個「講故事人」的自白》嚟回應。不過呢場筆戰其實係由羅孚一手策劃，呢兩篇文亦係兩人應羅孚要求而寫，並唔係外界所猜測嘅不和。不過亦有講法話，之後《射鵰》出第三版，金庸為KO依個破綻，加入咗「楊老者」嘅角色，解釋首曲唐代已經有，仲流傳咗好耐添。

現實生活方面，梁羽生同金庸私交甚篤，成日一齊捉棋。據講梁羽生移居澳洲後返親香港，金庸都做東請客，而金庸去悉尼，梁羽生又會特登去睇佢。報道話梁羽生當年病重果陣，梁羽生嘅兒子唔希望外界知道呢個消息，但金庸例外，可見二人交情之深。

原圖嚟自網絡。