遇到三角戀，通常無咩好結果。喺1993年，大埔寶湖花園發生燒屍肢解案，死者係寶湖道街市一間燒臘店嘅女東主，而兇手居然係死者丈夫嘅情婦。最恐怖嘅係，單案曝光之後一度傳出屍體殘肢被製成叉燒或其他燒味出售，引起區內市民恐慌。

死者係33歲嘅鍾彩娟（阿娟），佢原本同丈夫羅福成（阿成）喺寶湖道街市經營燒臘店，不過花心嘅阿成早喺1989年就同大過佢十幾年嘅錢燕荷（阿荷）發生婚外情。阿成為咗方便「偷食」，竟然向老婆訛稱阿荷係自己嘅親戚，仲將其中一個檔口交俾阿荷打理，兩人不時喺檔口裡面幽會、鬼混，到咗1992年姦情先被踢爆。

喺1993年7月5日，阿荷就因為燒臘店同錢銀問題，去檔口搵大婆阿娟講數，後嚟兩個人仲返咗阿荷响寶湖花園嘅住所。阿荷不斷威逼對方唔好取消燒臘檔個牌，不過阿娟企硬唔肯。阿荷喺憤怒之下，居然勒死咗阿娟。佢第二日照常返燒臘店煮齋，期間被滾油濺到，竟然令佢萌生燒屍嘅念頭。阿荷買埋火酒同金銀衣紙返屋企，將阿娟嘅屍體放入浴缸，鋪上金銀衣紙之後就淋火酒，繼而燒屍。燒到屍體燶晒之後，阿荷就好似斬燒味咁，用菜刀分屍，將屍碎分成幾袋，搭的士去郊野棄置。

而阿成就因為阿娟失蹤而報警，亦交代咗呢段三角關係，警方好快就上門，見到阿荷塊面同手甩皮，仲出水泡，調查之後就拘捕咗佢。阿荷最終誤殺罪成，被判監6年，阿娟嘅家人對判決非常不滿，兩次申請司法覆核，又收集市民簽名，但最終無功而還。

原圖取自網絡。