阿史呢兩個星期都講咗一啲廣東响改革開放初期嘅歷史，正如阿史所言，廣東响改革開放初期其實出現好多社會問題，其中一樣就係走私。响改革開放初期，四個經濟特區門戶一開，國民就接觸到境外一啲先進嘅商品，好似電視機、錄音機、電冰箱等日常用家電，而且需求仲好大，結果帶嚟咗好嚴重嘅走私問題。但最大問題係，當時唔單止政府部門嘅打擊措施跟唔上情況，而且仲有唔少官員參與其中，倒買倒賣。當廣東沿海地區人民愈來愈俾得起錢，呢啲走私貨需求就愈來愈大，仲帶嚟咗好嚴重嘅治安問題，情況變得更加複雜。

其實當時嘅中央政府，對改革開放有兩派意見，一派係改革派，一派係保守派。改革開放雖然令沿海地區同城市有錢咗，但帶嚟嘅社會問題就令黨內保守派非常不滿，擔心改革開放推得太急成為另一個大躍進，又話咁搞落去特區會變成「解放前帝國主義者控制下的通商口岸城市租界」。結果响1982年，廣東省第一委書記任仲夷同省長劉田夫等廣東官員去北京，就唔能夠阻止走私同腐敗問題作出解釋。因為呢個已經唔單止係經濟問題，更加關係到社會主義嘅意識形態，隱藏住黨內保守派對改革開放政策嘅不滿。

哈佛教授傅高義幾年寫嘅著作《鄧小平時代》，提到呢段歷史就咁話：「直到離職之前，任仲夷一直處在北京壓力之下，但他繼續推行改革，維持著快速增長的步伐。」