鴉片貿易同中國以及香港嘅近代史密可不分,上次同大家介紹過香港舊時嘅賭牌之後,有史友提到鴉片牌,今日一於講講。

其實响1845到1941年期間,香港政府好大部份嘅收入都係來自鴉片貿易。雖然國際上有部份國家禁止鴉片銷售,但係面對龐大嘅稅收,香港政府依然對鴉片貿易開綠燈。政府當年曾經採用專利方式,每年拍賣鴉片牌,由價高者得標及經營。換而言之,當時賣鴉片屬於正當行業。

根據記載,1879年政府從鴉片煙商所收稅款超過二十萬,認真誇張。鴉片有好多個名,好似熟洋煙、生土、熟土、金山煙等,而鴉片嘅品種都分為公坭、波斯坭、中國坭等,仲有數量最多嘅白坭,而鴉片煙行因此又叫做公白行。

眾所周知,食鴉片會上癮。當時有間店會售賣戒煙餅同戒煙粉,佢就係大家好熟悉嘅品牌屈臣氏。鴉片禍害深遠,香港去到1946年二戰結束之後,政府先宣佈鴉片屬於非法,禁止市民吸食,並取消專賣制度。

原圖嚟自網絡。