阿史早排同秘書妹妹搭地鐵出去做嘢，經過金鐘站，秘書妹妹就問阿史點解金鐘嘅英文會係Admiralty，阿史就隨口答佢：因為以前係海軍基地囉！

話說早喺英國1841年佔領香港嘅時候，英國就喺中區海旁設置海軍儲物庫，亦係海軍基地嘅所在地。到咗1870年代，英國海軍喺金鐘附近一帶興建海軍船塢Admiralty Dock，用嚟修理大型艦隻。到咗1897年，英國軍艦添馬艦長期停泊喺呢個船塢，直至二戰後，金鐘位置被填海，英國海軍就將船塢搬到添馬艦，90年代將再海軍基地搬到去昂船洲。

至於點解當時叫做「金鐘」？話說以前仲係海軍船塢嘅時候，附近有幢駐港英軍兵房樂禮大廈，門口掛住一個金色銅鐘，每日到時到候就會有人打鐘，通知大家夠鐘食飯同放工，附近居民因此叫嗰度做「金鐘營房」，慢慢附近一帶就叫埋做金鐘，而英文名就依然度係叫Admiralty。

圖片為1900年代海軍船塢平面圖、添馬艦海軍基地，取自網絡。