早排翻煲電影版《鹿鼎記》，覺得劉松仁飾演嘅陳近南真係好型仔。講開陳近南，自不然諗起當年同樣致力於反清復明嘅將領鄭成功。明朝覆亡之後，滿族人入關建立清朝。當時明朝軍民响中國東南同西南地區對抗清軍，鄭成功正正就係其中一人。

1646年，鄭成功嘅爸爸鄭芝龍向清朝投降，不過兩父子意見唔一樣，鄭成功拒絕勸降，之後以福建沿海嘅廈門為根據地，對抗清朝。不過北伐失敗之後，鄭成功元氣大傷，於是佢諗住趕走荷蘭侵略者同收復台灣，擴大反清基地。

講返當年台灣嘅情況，話說1624年荷蘭侵佔台灣，對當地實行近40年嘅殖民統治，直至鄭成功嘅到來。鄭成功同荷蘭方面對戰9個月，最終於1662年驅逐荷蘭人，建立反清復明基地。不過隔咗幾個月之後，只有39歲嘅鄭成功於同一年逝世。

唔好以為講鄭成功同台灣歷史唔關香港事，其實當年清朝為咗孤立鄭成功政權，於是實行海禁，仲推行《遷界令》，包括香港在內嘅廣東、浙江、福建、山東等沿海地區居民一度需要內遷，令香港變成一片荒蕪，得返啲盜賊出沒。

原圖為電視劇《鄭成功》劇照，取自網絡。