之前講到紥腳嘅歷史,其實過往都有唔少資料話纏足始於五代十國,今日一於講講南唐後主李煜同妃子窅娘嘅故事。身為後宮之人嘅窅娘點解無端端要纏足?原來係為咗跳舞。

窅娘身形窈窕,又識唱歌跳舞,點會唔得李煜喜愛?根據宋代《墨莊漫錄》同元代《南村輟耕錄》嘅記載,李煜特登整咗六尺高嘅金蓮花台,形狀就好似一朵大蓮花入面仲有幾朵細蓮花咁,加埋啲瓔珞、絲帶做裝飾,真係好華麗。

舞台已經準備好,點少得表演嘅舞者?李煜命窅娘用布帛包住對腳,彎起腳背好似跳芭蕾舞咁,主要靠腳尖响蓮花台上翩翩起舞。而最重要嘅觀眾,即係李煜見到對新月形狀嘅腳掌,當堂嗒曬糖,仲寫咗句「蓮中花更好,雲裡月長新」嚟讚美窅娘。其他妃嬪見到,自然爭住模仿。纏足嘅出現初初可能係為咗跳舞,不過後嚟向另一個方向發展,令唔少婦女飽受苦楚。

原圖為劇照,取自網絡。