近排多個咗開電視嘅理由——陳松伶。講開松松姐姐，腦海自不然會浮現《閃電傳真機》嘅「烏卒卒，好似好似一隻黑蟋蟀；烏卒卒，隨時施法術。」佢唱歌固然係好聽兼充滿童年回憶，不過做戲方面都唔弱，拍過唔少經典劇集，今日同大家齊齊重溫~

翻查資料，陳松伶十幾歲就參加比賽，靠模仿葉蒨文得獎而入行。1989年，18歲卜卜脆嘅佢拍住黎明，响經典劇集《天涯歌女》入面飾演周璇，演繹出傳奇歌女周璇嘅起伏人生，一劇爆紅。唔講唔知，原來當時陳松伶一邊讀書一邊拍劇，真係無番咁上下毅力都做唔到。

去到九十年代，陳松伶拍過《新上海灘》、《大澳的天空》、《金玉滿堂》等劇集，仲有2000年嘅《金裝四大才子》，飾演刁蠻郡主朱娉婷，戲路宜古宜今。

講返唱歌先，有傳聞話陳松伶當年隻《天涯歌女》原聲大碟係1990年香港最高銷量嘅唱片，撼贏咗校長譚詠麟嘅《夢幻舞台》，超級威水，之後嘅兒歌《烏卒卒》、《夏季sha la la》等同樣膾炙人口。而最近《福爾摩斯奶》嘅插曲《有我便有你》都係由陳松伶唱，有機會不妨聽吓喇，不過阿史諗咗好耐都唔明，點解唔係主題曲……

劇照嚟自網絡。