過年嘅《新喜劇之王》，令大家記返起初初出道嘅張柏芝，除咗《喜劇之王》，佢同一年拍嘅《星願》，依然令大家記返起佢初初出道嗰時幾咁省鏡，幾咁清純。講返《星願》呢套戲，阿史睇完再睇，都仲係覺得好心酸。 

1999年任賢齊同張柏芝合作嘅呢套《星願》，唔單止係張柏芝嘅成名之作，令佢攞到第19屆香港電影金像獎嘅最佳新演員之外，仲係華語片嘅經典愛情電影。喺戲入面，任賢齊飾演一個又盲又啞嘅洋蔥頭，但佢依然正面樂觀，暗戀張柏芝飾演嘅護士姑娘。兩個人明明都對大家有感覺，但就要等到洋蔥頭遇到車禍死咗之後先發覺原來大家都鍾意對方。不過最慘都唔係呢樣，而係洋蔥頭死後中咗大獎，可以有5日時間翻去人間交待後事。就係呢5日時間，洋蔥頭同張柏芝經歷明明相愛但轉眼間就要陰陽相隔嘅慘情橋段。擁有過先要面對失去，遠遠比從來都無得到過更痛苦。

睇住張柏芝喊住咁同洋蔥頭講「你唔好唔理我」，仲有兩個人離別果一刻，張柏芝喺洋蔥頭手掌上寫嘅「等你」，結尾一幕真係睇到阿史有啲眼濕濕。2016年，內地一個綜藝節目裡面，張柏芝同任賢齊再次同台合唱電影主題曲《星語心願》，咁多年後，現場觀眾聽到呢首歌，依然感動到流淚，可想而知呢套戲嘅催淚指數有幾勁。呢部戲喺2003年日本亦有改編上映，不過經典呢啲嘢，有時翻拍、改編真係未必可以學到十足。

原圖嚟自網絡。