話說有日有位史友問咗個好深嘅問題:蔡孑民先生係邊個?難阿史唔到嘅,其實蔡孑民先生就係「北大之父」蔡元培。佢葬於香港仔華人永遠墳場,塊墨綠色嘅墓碑上面寫住「蔡孑民先生之墓」。依位教育事業上嘅成就相當高嘅「才子」,可能對於香港人嚟講比較陌生,不過佢對教育嘅貢獻絕對唔可以忽視。
蔡孑民,即係蔡元培,係浙江省紹興人,自幼熟讀經史,後嚟高中進士,做咗翰林院庶吉士。之後甲午戰爭,清廷簽訂咗《馬關條約》之後,蔡元培深受撼動,開始廣泛涉獵外國翻譯書報,學習西方文化。直到戊戌變法失敗之後,蔡元培深感要清政府改革渺無希望,於是毅然決定投身教育,培養革新人才,仲先後任中西學堂監督、南洋公學教習、中國教育會會長等職位。
民國成立之後,蔡元培出任教育總長、國立北京大學校長。佢就任北京大學校長期間,按照西方國家近代嘅大學模式整頓同改革北大,主張「思想自由,兼容並包」,聘請教授時唔理咩政治背景、信仰,只睇重學問。正正係因為蔡元培提倡嘅呢種自由嘅學習風氣,令北大成為中國第一間現代大學。
蔡元培仲創建咗「中央研究院」,呢間亦係中國第一所純學術研究嘅機構,佢任院長嘅12年間,陸續成立物理、化學、工程、地質、天文、氣象、歷史語言、心理、社會科學同動植物等研究所,為中央研究院日後嘅發展奠定基礎。1940年今日,蔡元培逝世,長眠香港。
圖為蔡元培館,原圖嚟自中央研究院院史網。