講起九江先生，可能唔知佢係邊位，不過史友一定聽過佢學生康有為嘅名。作為晚清維新變法嘅主要發起人，康有為曾經形容老師九江先生係「蓋國朝二百年來大賢巨儒，未之有比也」。究竟呢位九江先生有咩過人之處？又點樣教育學生呢？

九江先生名叫朱次琦，生於佛山南海，係晚清嶺南鴻儒，治學主張明理達用，無分漢宋。佢曾經入朝為官，雖然為官時間唔長，但就盡心盡力為百姓辦事，廣受大眾愛戴，係個廉潔清官。九江先生辭官回鄉之後，開設禮山草堂講學，唔少人慕名前去求學，著名嘅弟子包括有康有為、鴻儒簡朝亮、晚清官員梁耀樞等。

根據記載，九江先生畀康有為嘅訓示係「戒傲」。話說九江先生極力推崇文學家韓愈，叫學生讀多啲韓愈嘅古文，不過康有為話之前古代嘅文學家都係裝腔作勢，根本唔了解咩係「道」，仲話韓愈係浪得虛名，搞到其他同學話康有為目無尊長兼膽大妄為。面對學生挑戰，九江先生無不滿，剩係講咗句：「想法太狂了一些」，包容學生嘅唔同諗法。其實九江先生努力培養大批有道德、有才能嘅人才，希望解決晚清內憂外患嘅困境，所以佢喺教育學生嘅時候特別注重學生嘅道德品質修養。九江先生嘅行為同思想對康有為有深遠影響，亦令康有為日後走上變法之路。

九江先生治學以明理達用為主，生前著有《國朝學案》、《國朝名臣言行錄》、《蒙古記》等。據講佢响臨終前，唔知因為咩原因，居然將部份手稿焚毀，令心血化為塵土。

資料嚟自《金羊網》，圖為朱九江紀念公園，原圖嚟自網絡。