每位特首都會有一位副官跟實，主要負責特首安全，喺唔同場合事先了解保安、場地、儀式、路線安排等等，另外亦都要負責一啲禮節性工作，例如代特首接待客人或者出席一啲特別儀式等等。其實「副官」呢個職位早喺香港開埠初期已經有，當於以前殖民地首長都係由軍人擔任，而佢哋嘅副官亦隨軍嚟到中國，所以就開始咗有副官呢個傳統，一直以來副官都係由軍人出任，直至第二次世界大戰之後，先至改由警察出任。

第一個出任副官嘅警察係叫竇信嘅外籍助理警司（Assistant Superintendent R. Dawson）。喺香港回歸前，首長副官都係由外籍人員擔任，直至回歸後，先至開始由華人出任副官，而第一位華人副官就係杜漢基警司。

作為香港首長，通常都有唔少禮節性工作，所以除咗一個正式副官之外，亦都有一啲兼職成份嘅名譽副官，分擔一啲禮節性工作。曾經有一位做過名譽副官嘅警員就分享過，接待一啲外國元首之前，都要做足準備功夫，因為啲元首不時都會問起香港天文地理、社會歷史，準備少啲都隨時被佢哋考起！曾經有一次，太平洋島國湯加國王訪問內地，嚟香港轉機，嗰位名譽副官發現國王兩隻手一共戴咗四隻錶，覺得奇怪，於是好有禮貌咁話，「國王您戴住四隻錶，一定係有特殊原因喇」。國王解釋，原來四隻錶分別顯示北京、澳洲、紐西蘭同湯加嘅時間，而依幾個地方正正就係佢呢次訪問嘅目的地同轉機地點。四隻錶咁多？睇嚟國王真係好有時間觀念喇~

圖片為已故湯加國王圖普四世，取自網絡。