上次講起PMQ元創方嘅前世今生，今日繼續講埋佢嘅「變身」過程。元創方本身係皇仁書院舊址，但喺第二次世界大戰期間，校舍成為日軍騎兵部隊嘅司令部，1944年校舍發生大火，燒毀咗校舍頂部，後嚟被改建成已婚警察宿舍，連《愛回家》嘅演員丹爺劉丹都住過㗎。

話說當年大火之後，校舍於1948年清拆，三年後年改建成兩座已婚警察宿舍同少年警訊會所，但就保留咗個地基、圍牆、擋土牆、多組花崗岩石柱同柱墩，以及士丹頓街入口石階同連接上下平台嘅大石階。宿舍係香港首個為華人員佐級警員提供住所嘅地方，希望可以吸引更多人加入警隊，同提升警隊士氣。宿舍提供140個一房、28個兩房單位，入住嘅人大多數都係中央警署任職嘅警員。

警察宿舍喺2000年開始空置，2009-10年度《施政報告》將嗰度列入「保育中環」政策嘅八大項目其中之一，並計劃改造成為標誌性嘅創意中心。元創方最後喺2014年開始試業，成為今時今日香港其中一個地標。

原圖取自網絡。