早兩日公司有個同事，過咗返工時間成粒鐘都唔見人，秘書妹妹以為佢病咗就打去問問，點知個同事就話臨時有事返唔到工，搞到秘書妹妹收線之後係咁話佢成隻無尾飛鉈咁。

所謂嘅無尾飛鉈，通常用嚟話人嘅行蹤飄忽，又無嚟交帶，暗指做事唔夠成熟穩重。其實飛鉈係一種武器，由繩同鈍物組成，鈍物可以係石頭、金屬製嘅圓錐形等重物，由繩嘅一端綁住，用嘅時候只需要掟出鈍物攻擊就得，拉返條繩就可以收返個鈍物。而無尾飛鉈即係指無繩綁住嘅鈍物，一掟出去就唔受控制，根本唔知佢去咗邊，更加唔好話要收返嚟喇。因此，「無尾飛鉈」又可以用嚟形容事物一去無回頭咁解。飛鉈勁唔勁阿史真係唔知，不過睇返相，連黃飛鴻妻子莫桂蘭都玩過，仲功架十足添，一個字：型！

圖為莫桂蘭使用飛鉈及飛鉈示意圖。